Telefon tanlash ko'pincha reklamadan boshlanadi: kimdir «108 megapiksel» deydi, boshqasi «12 GB operativ» deydi, va oxirida odam o'ziga kerak bo'lmagan narsaga pul to'laydi. Quyida — tartib bilan, qaysi birining haqiqatan ahamiyati bor.
1. Avval byudjet, keyin model
Modelni tanlab, keyin unga pul qidirish eng keng tarqalgan xato. Teskarisi qiling: qancha ajrata olishingizni ayting, shu oraliqdagi barcha variantlarni ko'ring. Bizning narxlar jadvali barcha modellarni bitta sahifada, arzonidan qimmatiga qarab ko'rsatadi — shu yerdan boshlash eng tez yo'l.
2. Doimiy xotira: 128 yoki 256 GB
Bu eng ko'p afsuslanadigan nuqta. 64 GB bugungi kunda kam: tizimning o'zi 15-20 GB oladi. Oddiy foydalanish — qo'ng'iroq, messenjer, ijtimoiy tarmoq, vaqti-vaqti bilan surat — uchun 128 GB yetadi. Agar ko'p video olsangiz, o'yin o'ynasangiz yoki telefonni 3-4 yil ishlatmoqchi bo'lsangiz, 256 GB dan boshlang. Xotirani keyin kengaytirib bo'lmaydi — ko'pchilik yangi modellarda xotira kartasi uchun joy yo'q.
3. Operativ xotira (RAM)
RAM — bir vaqtda nechta ilova ochiq tura olishini belgilaydi. 4 GB bilan telefon ishlaydi, lekin ilovalar orasida tez-tez almashsangiz ular qaytadan yuklanadi. 8 GB — bugungi oltin o'rtalik. 12 GB dan yuqorisi kundalik foydalanishda sezilarli farq bermaydi.
4. Batareya
5000 mA/soat — bugungi standart, kun bo'yi yetadi. Undan muhimroq narsa — quvvatlash tezligi: 33 vattdan yuqori bo'lsa, telefon yarim soatda yarmigacha to'ladi. Kuniga ikki marta quvvatlash kerak bo'ladigan odam uchun bu sig'imdan ham qimmatroq.
5. Ekran
Ikki narsaga qarang: turi va yangilanish chastotasi. AMOLED ekran IPS'dan yorqinroq va quyoshda yaxshi ko'rinadi. 90 yoki 120 Gts chastota — aylantirganda silliqlik beradi; bir marta ko'rgandan keyin 60 Gts ga qaytish qiyin.
6. Kamera — megapiksel emas
108 MP kamera 50 MP dan avtomatik yaxshi degani emas. Rasm sifatini matritsa o'lchami, optik stabilizatsiya va dasturiy ishlov belgilaydi. Eng oddiy tekshiruv: do'konda telefonni oling va kech kirganda, past yorug'likda surat oling. Kunduzi hamma kamera yaxshi suratga oladi.
7. Kafolat va xaridan keyingi xizmat
Telefonni sotib olishdan oldin quti ochilishini va qurilma tekshirilishini so'rang. Bizda har bir telefon do'konda ochib ko'rsatiladi: IMEI tekshiriladi, ekran, kameralar va tugmalar sinovdan o'tkaziladi. Qaytarish shartlari bilan ham oldindan tanishib qo'ying.
Qisqacha
- Byudjetni belgilang, keyin model tanlang;
- 128 GB — minimum, 256 GB — xotirjamlik;
- 8 GB RAM yetarli;
- Quvvatlash tezligi sig'imdan muhimroq;
- Megapikselga emas, kechqurungi suratga qarang;
- Qutini do'konda ochirib, tekshirib oling.
Tanlagan modelingiz uchun bugungi narxni ko'ring yoki Termizdagi do'konimizga kiring — qo'lingizga olib ko'rish har qanday sharhdan foydaliroq.
